Ís úr sauðamjólk

 Framleiðsla íss úr sauðamjólk. Hagaís

Ábúendur að Syðri-Haga tóku þátt í þóunarverkefni Sauðamjaltir á árunum 2005-2010. Verkefnið miðaði að því  festa framleiðslu sauða- og geitamjókur í sessi og auka þekkingu og reynslu bænda á sauðamjöltum. Alls mjólkuðu ábúendur  5.089 lítra af sauðamjólk á þessu tímibili. Mjaltatímabilið er frá lok ágúst og fram í október. Einnig voru geitur mjólkaðar árið 2010. Mjólkursamlagið í Búðardal gerði osta úr mjólkinni en þegar verkefninu lauk bauðst framleiðendum mjólkurinnar verð fyrir mjólkina undir framleiðslukostnaði. Ábúendur hafa síðan þá leitað leiða til að nýta þessa frábæru afurð, en í mjólkinni er mun meira prótín og fjölómettaðar fitusýrur en  í kúamjólk og þrefalt meira af C vítamíni.

Síðast liðið haust var hafist handa við að þróa ís í samstarfi við Holtsselís undir merkjum Hagaís/Holtsel og eru þrjár bragðtegundir nú þegar komnar á markað, bláberja- jarðaberja- og vanilluís. Í framleiðsluna er notaður ávaxtasykur og hentar hann því einnig fólki með sykursýki. Mörg dæmi eru um að fólk sem er með ofnæmi/óþol fyrir kúamjólk þoli afurðir úr sauðamjólk.

Unnið er að markaðssetningu og til að byrja með fæst ísinn í Hagkaupi Akureyri,  Frú Laugu Reykjavík og Holtseli. Einnig er hægt að hafa samband við ábúendur i Syðri-Haga en þeir eru aðilar að Beint frá býli og bjóða einnig til sölu geitakjöt, lamba- og geitaskinn og kanínufiðu.